Summa
Vnnd kurtzer Inn=
halt DRAMATIS TRAGICI
Vonn dem Todt/ Oder Todtentantz.
Inn welchem etliche sonderbare/ er=
schroeckliche/ vnd wahrhaffte Außgaeng auß
disem Leben/ so wol der jungen als der
alten
Leuth begriffen werden.
Gehalten inn dem Academischen Gymnasio
Societatis IESV Zu Ingolstadt/ den
VI. Februarij, Anno
M.DC.VI.
Getruckt in der Ederischen Truckerey/
durch Andream Angermeyer.
DEVTER. XXXII.
Wolte GOtt/ sie verstuenden vnd
betrachteten die letste Ding.
I. PROLOGVS.
ESaias der Prophet betrachtet bey sich selbs den Stand
deß Menschlichen Geschlechts [Esaiæ 40.]. Hoert ein Stimm/
welche jhn vermahnt/ er soll außruefen. Fragt/ was er ausrueffen
soll/ vnd vernimbt dise Wort: Alles Fleisch ist Hew/ vnd aller sein
Pracht wie ein Feldblum/ welche verschwaelcht vnd abfaelt. Diser Sententz
gibt jhm Vrsach weyter zu reden von Kuertze deß gegenwaertigen
Lebens/ vnd verwundert sich/ daß ein Mensch stoltzieren koende
welcher doch kein Augenblick vor dem Todt sicher ist/ vnn durch denselbigen
den allerveraechtlichsten Menschen gleich muß werden. Diß
zu bestaetigen findet er einen TodtenKopff/ welcher jhm antwortet: Jedermann
Klein vnd Groß/ Reich vnd Arm/ Edel vnd Vnedel muessen sterben/
vnd sey nichts rathsamers/ dann offt gedencken: Schaw wie du sterben
woellest. Der Todt kompt entzwischen/ sagt/ dise Predig werde vnangenaem
seyn etlichen auß den Zuhoerern/ woelle selbs sein Ampt verrichten.
ACTVS I.
SCENA I.
MOrs oder Todt beruembt sich seines Gewalts/ den er empfangen
vber alle Koenig/ Keyser/ Potentaten/ vnd die gantze Welt/ also daß
kein Mensch gelbt hab/ oder werde/ der den Todt nit sehen muesse [Psalm.
88]. Satan der oeberste Teufel kompt in veraenderter Gestalt/ zeigt
an/ er habe den Erdtkreyß durchwandert/ vnnd vermerckt/ sein Reich
hab ein gluecklichen Fortgang [Iob I.]. Foercht der Todt werde jhm ein
Abbruch thun/ wann er mit seiner Gegenwahrt die Leut erschroecke. Der
Todt verheisset jhm/ es sey kein Gefahr: Dann sie vergessens gleich
widerumb. Damit es aber desto lieblicher zugehe/ woelle er die Menschen
zu seinem Tantz laden/ welches Wort allen angenaemb. Nach dem Satan
abgewichen/ kommen deß Todts Diener/ Als Tempus die Zeit/ Morbus
die Kranckheit/ Casus, oder Toedtliche Zufahl/ verheissen dem Todt Jhren
geneigten Willen inn Berueffung aller Hand Tantzer. Woellen auch kein
Vnderscheyd der Zeit halten/ weil dem Todt die Vorhergehende/ Gegenwaertige/
vnd Zukuenfftige vnderworffen seynd.
ACTVS I. SCENA II.
BLasphemulus ein kleiner Knab/ vonn welchem S. Gregorius
schreibt/ sagt seinem Vatter Conniuio mit freuden/ wie er schweren vnd
fluchen künde [S. Greg. Dial. lib. 4.c.18]. Der Vatter lobt jhn
darumb/ gibt jhm wuerffel vnnd Kartespil. Der Knab rufft seinen Gesellen/
mit denen er vmm gelt spilt. Wie es jm aber mißlungt/ Laestert
er Gott nach seinem brauch. Morbus Ladet jhn zum Tantz/ er aber verspottet
denselbigen/ empfindt doch geschwindt ein Veraenderung. Berufft den
Vatter/ welchem der Todt begegnet/ sprechende/ er sey ein guter Artzt.
In dem der Vatter den Todt abhalten wil/ wirt das Kindt von zween Teuflen
vexiert/ begert hilff von dem Vatter/ aber vmbsonst/ dann der Todt fuehrt
es mit sich/ die Teufel aber/ dieweil es Gottes Maiestaet geschaendt/
fuehren die Seel der Hoell zu. Der Vatter klagt sehr diesen Vnfahl/
wirdt aber gestrafft vonn der Zeit/ als der durch sein vbersehen an
deß Kindts Verdammnuß schuldig sey.
ACTVS I. SCENA III.
EIn armer Holtzsambler beweinet sein Armuth/ kan die Buerden
vor Schwacheit nit ertragen. Wolte sich selbst erhencken/ aber gedenckt/
es moechte jhme noch groessers Ellend in der andern Welt zuestehen.
Rufft dem Tod/ dz er jm den Garauß mach/ der Todt ist nit langsamb/
fragt was sein beger sey/ diser vor Forcht weißt nit was er antworten
soll/ begert der Todt soll jhm die Buerden Holtz auff helffen laden/
vnnd wil noch nit sterben. Der Todt jetzund betrogen steigt in ein Gruben/
sicht zween andere/ als ein Astrologum, welcher dem Juengling Cenelpio
langes Leben verheisset/ vnnd solches auß deß Himmels Lauff
vnd gestirn. Tempus verkuendiget jhnen/ also denen so vergewißt
langes Lebens/ die Stund deß Todts/ vnd werden Vnuersehens in
die Gruben gezogen/ damit man verstehe/ wie Vngewiß der Menschen
Wohn sey: welche jhnen selbs vil Jar verheissen.
ACTVS I. SCENA IV.
DEr Einsidel Hilarion auß befelch deß Engels
wil Stephanum, welcher in die Wuesten auß dem Kloster an berg
Synai gewichen/ damit er Gott einsamb dienen kuende/ heimsuchen [S.
Hier. de S. Hilar. in vita ciusden, c. 4.]. Zu diesem heyligen Hilarion
kommen zween Moerder/ woellen Gelt auß jhm schroecken/ Troewen
jm den Todt. Welcher nit allein sich nit entsetzet/ sonder mit froelichem
Angesicht zu sterben begert/ weil er sich schon vorlang zu dem Todt
bereyt. Diese Bestaendigkeit hat die Moerder also bewegt/ daß
sie jhm das Gleyt geben/ vnd Besserung deß Lebens versprochen.
ACTVS I. SCENA V.
EIn frecher vnnd noch vnerfahrner Kriegsman wil in Vngern
ziehen/ vnnd dort etliche Jhar streiten/ richtet sich Ernstlich/ vnd
bereittet seine Waffen/ zu welchem sich Tempus nahet/ vnd verkuendiget
jhm den Todt/ der aber noch Jung vnd Starck will nichts von Sterben
hoeren/ sonder wolte dem Todt selbs dapffer begegnen. Richtet sich wider
den selbigen: da er aber ihn ersehen/ lasset er die Buechsen fallen/
vnnd wirdt von dem Todt erschossen/ welcher zuvor die Buechsen gelobt/
als ihm ein sehr tauglich vnnd angenembs Instrument die Leuth zu toedten.
ACTVS I. SCENA VI.
STephanus der Einsidel wil nach seinem Brauch einen Kirchhof
besuchen/ vnnd alda fueglicher vonn dem Todt betrachten. Begegnen jhme
auff dem Weg Phaedromus, Amerimnus, Polypotes, Rhipsocindynus, froeliche
Juengling mit Seitenspiel. Stephanus redt sie an/ vnd fuehret sie auff
den Kirchhof/ zeiget jnen die Todtenbeyner/ damit sie an die letzten
Ding gedencken sollen [Ex Dialog. Animae & corporis Ruperti Episcopi
Licoln]. Diese aber gantz Zornig wolten darvon eilen/ wann nicht auß
der Hoell herfuer wer kommen ein verdambte Seel/ welche den Leib in
dem Grab klaeglich anredet/ Strafft jhn der Eytelkeit/ vnd Verkuendiget
jhm zukuenfftige Straff nach dem letzten Gericht/ dieweil er in diesem
Leben nicht gefolgt/ auch nicht Buß gethon/ sonder Wollust gesucht
in Speyß/ Tranck/ vnnd dergleichen sachen. Nach dem die Seel wider
zur Hoellen geschleifft/ halten die Juengling dieses Gesicht fuer ein
Spiegelfechtung/ verlachen den frommen Einsidel/ vnnd eilen dem Wirtshauß
zu mit frolocken.
ACTVS I. SCENA VII.
DEr Alt beweint der Juengling verderben/welchen die Zeit
durch den Casum ein schroecklichen jeden Außgang vnd mancherley
Toedt vorsaget/ wiewol sie abwesent. Eutyches entlediget den Todt von
Banden/ welchen einer betrueglicher Weyß gefangen gehabt. Dieweil
es aber nit seyn kan/ daß einer vom Todt frey ledig sey/ hat der
Todt seinem Erlediger disen Lohn versprochen/ daß er ihm drey
Potten welle senden/ ehe dann er jn abfordern woell [Is. XXVIII.percussimus
foedus cum morte.]/ Eutyches hat disen Pact nit recht Verstanden/ vnd
geht froelich Gut vnnd Gelt zusamblen/ weil er also versichert.
ACTVS II. SCENA I.
TEmpus oder Zeit verwundert sich/ dz die Leuth so hefftig
begeren lang zuleben wann sie gleich mit grosser Armuth vberfallen/
vnd die Nahrung durch das Bettlen samblen muessen. Damit er das bestaetige/
wirt ohn gefahr ein Blind herauß gefuert/ welcher dem Tod zuentfliehen
an ein anders Orth sich fueren lasset. Die Zeit kan jn nit bereden/
daß kein Ort sicher sey/ sonder wohin einer sich begeb/ fuehr
er den Tod mit sich. In dem er nur fort eilet/lasset sich der Todt merken/
vnnd fueret den armen Blinden an stat deß fliehenden Knaben/ zu
seinem Tantz.
ACTVS II. SCENA II.
Phaedromus, Polypotes, Rhipsocindynus, Amerimnus kommen
auß dem Wirtshauß/ jr zween woertlen mit einander wegen
eines versagten Truncks/ also daß sie zur Wehr greiffen/ vnd der
Rhipsocindynus den Amerimnus Toedtlich verwundt. Sie tragen jn von dannen/
dem der Todt auff den Versen nachfolgt. Die zween andern Troesten sich
selbs mit der kandten/ in welche Morbus ein vergifftes Puluer wirfft/
dardurch dem Polypotae der Garauß gemacht/ wiewol er/ aber zu
Spat/ verheysset er woell fromb werden/ vnd in ein Geistlichen Orden
tretten/ die Zeit verspott diese hinckende Anschlaeg/ vnd sagt er sols
bey gsundem Leib gethon haben.
ACTVS II. SCENA III.
DEr Doctor von Pariß/ welches im Leben deß
H. Brunonis meldung geschicht/ nach verrichtem Gebett/ fragt seinen
Diener/ was die Leuth von jhm halten. Lasset jhm das Lob wolgefallen.
Entzwischen Rhipsocindynus jetzund flüchtig geth fuerueber/ damit
er der Straff entweich. Der Doctor beklagt der Parisischen Studenten
aeregrlichs vnd freches Leben/ welche jrer Eltern Vncosten so vbel anlegen.
Ersicht Morbum als einen Bettler/ verschafft jhm ein Almosen zureichen.
Morbus aber ladet jn zum Todtentantz. Er gibt sich/ doch schwerlich
dem willen Gottes/ in bedencken/ daß er der Christlichen Kirchen
noch vil Nutz sein koendte/ wie er bißhero gethan. Sathan ermant
seine Diener sie sollen kein Fleiß sparen deß Doctors verderben/
weil vil daran gelegen/ daß ein solche Person verdambt werde.
ACTVS II. SCENA IV.
EMporus ein Kauffman begert nach seinem brauch Rechnung
von seinem Diener/ welcher sich beschweret solcher vnnoetigen fuersorg/
dadurch er die Kirchen offt versaumen/ vnnd vil Vnglegenheit leiden
muß. Der Kauffman fahret fort im Gelt zelen vnd Register vbersehen/
zu welchen Morbus sich heimlich nahet. Emporus vermeint/ es sey ein
Bettler/ wirdt aller dings vnlustig. Morbus ladet jhn zum Todtentantz/
welches er keines wegs glauben wil/ er zeige jm dann Brieff. Sagt/ der
Todt soll selbs kommen: der sich dann nit lang besonnen. So bald jn
Emporus ansichtig worden/ Laufft er jhm mit Gelt entgegen. Der Todt
verschmaecht die Schanckung/ fuert jhn daruon/ vndlasset nichts mit
sich tragen/ dann seine Werck/ welche einem jeden nachfolgen/ sie seyn
gut oder boeß.
ACTVS II. SCENA V.
STephanus Einsidel schwach vnnd kranck/ nach volbrachtem
Gespraech mit Hilarion, welcher jn besucht/ legt sich auff ein Matzen
nider/ vnd ein Stein vnder das Haupt/ begert Hilarionis vnnd der bekerten
Moerder gebett/ er aber wirdt gleichsamb verzuckt/ sicht die Engel zu
jhm kommen mit einem grossen Buch/ darin seine gute Werck geschriben
[Diony. Car. c. 34. Nouis. lib. 2. ex Climacho.]. Darauff kommen Sathan
vnnd seine Gesellen vol frewden von dem Parisischen Doctor/ welchen
sie fuer eigen halten/ wiewol das Vrtheyl noch nicht gefelt sey. Ersehen
den Stephanum, dem sie mit einem kleinen buechlein zueilen. Engstigen
jhn dermassen/ daß er offt sagt/ sie Liegen/ offt bekennet er
es/ aber habs gebeicht vnd Buß thon. Letstlich halten sie jhm
ein Suend fuer/ die er nit laugnet/ aber sagt Gott sey gnaedig. Darauff
jn gleich der Todt ergreifft. Die Engel haben gute Hoffnung/ die Teuffel
haben die letste Stim nit gern gehoert/ in welcher er Christo seinen
Geist befohlen. Hilarion nimbt Vrsach die buessende Moerder zum Eyffer
zuerwecken. Dann weil Gott sich so Straeng erzeiget gegen einen Man/
der jhm so lange Jar in der Wuesten gedient/ was werden die vnbueßfertigen
Suender fuer ein Gericht zuerwarten haben: dann ob er wol nit Vermeint/
daß diser Verdamt/ sonder sey jhnen zum Exempel geschehen/ sollen
sie doch auffmercken/ vnd ernstlich Buß thun.
ACTVS II. SCENA VI.
NAch dem deß Doctors Leichnam in die Kirchen getragen/
halten jhm die klagende einen Liechtantz/ vnnd wirdt wirdt die Vigilien
angefangen [Exvit. S. Bru. 5. Oct. apud Sur. ex. Fran. Puteo.]. Als
man aber zu den Worten kommen: Responde mihi: Antworte mir: richtet
sich der Todt auff vnd schreyet: Ich bin vor dem Gericht Gottes anklagt
worden. Man faengt die Vigil widerum an vnd repetiert eben dise Wort:
Antworte mir. Der todte richtet sich gleichfalß auff vnd schreyet:
Ich bin von dem gerechten Vrtheyl Gottes gericht worden. Auß diesen
worten hat man noch nichts gewiß schliessen koenden/ wirdt derhalben
die Vigil zum dritten mal angefangen. So bald man wider zu diesen Worten
kommen: Antworte mir/ richtet sich der Todte gleichfals auff vnnd schreyet
erschroecklich: Ich bin von dem Gerechten vrtheyl Gottes verdambt. Alle
vmbstehende erschroecken hefftig/ vnnd Beschliessen man soll den Leichnam
in ein stinckende Pfitzen werffen. Bruno ein fuernemer Doctor/ mit seinen
Gesellen Landuino, Hugone, Andrea &c. gehen zu Rath mit einander/
vnd nemmen jhnen fuer ein strenge Buß zuthun/ weil es disem Doctor/
welchen man nach Menschlichem ansehen fuer Heylig gehalten/ so vbel
ergangen. Besinnen sich hin vnd wider/ wie die Sach an zugreiffen/ vnd
hoeren die Engel mit Worten vnd Symbolis oder eysserlichen Zeichen der
Welt Eytelkeit außfuerlich beschreiben. Dancken Gott dieser jnnerlichen
Heymsuchung/ vnd woellen sich alle in ein grawsame Wuesten begeben.
Welches auch geschicht/ vnd daher hat der Carthaeuser orden seinen Vrsprung.
ACTVS. III. SCENA I.
TEmpus verflucht den jrthumb der Menschen/ welche meynen
die Jungen seyn lang sicher vor dem Todt/ vnd die Alten allein haben
jnen zu foerchten/ daß dem nit also sey/ fragt er einen Pawren
welcher ein Laemblein gen Marckt traegt/ warumm er daß klein Thirlein
verkauffen woel. Der Pawer gibt auch die Vrsach/ weil man sagt d'jungen
thierlein Fleisch sey lieblicher/ vnd darumm mehr junges als altes Viech
zur Schlachtbanck gefuert werde. Auß diesem nimbt Tempus vrsach
die Meinung ab zuleinen/ vnd anzuzeigen/ man soll nit trawren/ wann
einer in der Kindheit stirbt. Zu welchem vorhaben geth einer auß
Thracia gebuertig herfuer mit seines Kindleins leich [Valer. Max. lib.
2]/ ist gantz froelich/ vnnd stellet Seytenspiel an/ die weil daß
Kinst so vil Muehe vnd Arbeyt entrunnen ist/ also daß man billich
Weinen soll/ spricht er/ wann einer Geboren/ vnnd Lachen/ wann einer
Stirbt. Tempus bestettiget solches/ vnd lobt diesen Thracier.
ACTVSIII. SCENA II.
GAusapius ein Hoffman Coenredi deß Koenigs Merciorum
beruembt sich/ wie er seine Gesellen im Trincken vberwunden hab [Bredenba.
lib. 3. ex Bed. lib. 5.c.14. Hist. Angl.]/ vnnd die gantze Nacht gesoffen.
Empfinde einen Hauptwehe/ dann der Morbus hat jhm etwas in den Pecher
geworffen. Setzt sich ein wenig zu Ruhen/ kan aber nit vor Schmertzen.
Lasset solches dem Koenig anzeygen: welcher/ weil er ihn sonderlich
Lieb/ allein zu jhm kombt/ ermant jn zu Beichten vnd besserung deß
Lebens. Gausapius foercht/ die Gesellen werden seiner Spotten/ wann
er so Forchtsam wer/ vnd den Tod foerchte. Der Koenig wil jm Artzney
lassen verordnen. Gausapius wirdt jhe mehr vnd mehr Schwach/ meint doch
er koendte durch sein Jugendt alles vbertragen. Sicht zu jm kommen zween
Engel mit einem kleinen Buechlein/ darinn er gar wenig gute Werck findt/
welche er in der Jugent gethon. Denen Folgen gleich nach die Teuffel/
welche ein vberauß groß Buch bringen/ vnd jm alle Gedancken/
Wort/ vnd Werck/ fuerhalten. Die Engel gen Trawrig daruon. Wie nun der
Artzet vnd Apothecker kommen/ finden sie ihn deß Todts eygen/
sagens dem Koenig/ welchem der Hoffmann den gantzen Handel erzellt/
Sprechend/ es helff nichts mehr/ er sey schon Verdambt: dann das Schwerdt
goettlicher Rach hang jm ob dem Kopff/ vnd die Hoell stehe offen. Derhalben
die boesen Geister schreyen dem Todt zu/ damit er jhm bald das Leben
nemb/ vnd die suendige/ vnbußfertige Seel außtreib.
ACTVS III. SCENA III.
KOenig Coenredus stellet zween Trabanten fuer die Thuer/
vnd befilcht dem Medico vnd Apothecker/ daß sie weder Todt noch
Kranckheit einlassen Morbus wirdt erstlich abgetriben/ Casus in gestalt
eines Botten wil Brieff dem Koenig auß der statt Laim vbergeben/
wirdt auch nit eingelassen/ sonder die Trabanten woellens durch mittel
Personen dem Koenig vberantworten. Der Todt nimbt gelegenheit durch
dieses abtretten/ vnnd steigt zum Fenster hinein [Hierem. 9]. Also wirdt
eylendts der Medicus geruefft welcher doch wider den Todt kein Artzney
kan finden.
ACTVS III. SCENA IV.
EVtyches, welcher zuvor mit dem Todt einen Pact gemacht/
Ruembt sich seines wolstandes vnd Reichthums/ welche Glueckseligkeit
desto groessen/ weil er vom Todt lange Zeit vergwißt. Wiewol er
aber vil Gut zusammen gebracht/ ist er doch also Karg/ dz er einem armen
Pawren nit etliche Metzen korn leyhen woellen [Eccles. II. & Luc.
12.]. Morbus redet jm also zu: du thorechter Mensch/ heut wirdt der
Todt dein Leben nemmen/ vnd wer wirdt deiner Gueter erb seyn? Kehrt
sich aber nit an diese Wort/ sond' spricht seiner Seel also zu: Hab
ein guten Mut/ hinfueran/ Trinck vnd jsse e.c. wil auch seine Schewren
erweitern vnd new bawen/ aber der Todt begegnet jhm/ vnd sagt/ es sey
zeit/ daß er mit jhm gehe/ dann er hab jm drey Botten nach seinem
verheyssen geschickt/ nemmlich ein Fieber/ Husten vnd grawe Haar.
ACTVS III. SCENA V.
HEautontimorumenos wil sich selbs entleiben/ damit er
den Todt nicht allzeit foerchten muoß/ wirdt abgehalten vonn seinem
Gesellen/ welcher jhm Verspricht/ er woelle sein Aduocat seyn/ wann
der Todt komme. Braucht derhalben vil Argument den gegenwaertigen Todt
zu vberwinden/ vnd dahin zuvermoegen/ daß er dem zitternden Juengling
das Leben schencke. Der Todt veracht die wolredenheit/ fueret alle beyd
hinweg: dann er spricht/ wann er sich zuvor bereyt het/ wurde er jhm
nicht foerchten.
ACTVS III. SCENA VI.
XEnophon geht den Goettern zu opffern fuer seinen Sohn/
den er gehn Mantineam wider die feindt [Plutarch. de Consol. ad Apollon.
Va ler. Max. I.5] deß Vatterlandts zukriegen geschickt. Begegnet
jhm ein Klagender/ dem sein Sohn gestorben. Xenophon troestet jhn/ vnnd
heisset von vberigem leid abstehen. Diser gibt jm zur antwort/ er wisse
nit was es sey einen Sohn verlieren. Darauff wirdt Xenophonti bottschafft
bracht/ sein Sohn sey in der Schlacht erschlagen worden: legt die Cron
von sich: wie er aber verstanden/ er sey Ritterlich gestorben/ danckt
er den Goettern/ vnnd wirdt Penthinius etwas getroeßter/ dieweil
ein Christ sich in disem fall nit von einem Heiden soll vberwinden lassen.
In dem kommt ein anderer/ welcher seines Vetters Todt auß Gleißnerey
beweinet/ aber heimlich fro gewesen: daß er jhm vil im Testament
verlassen: sagt/ wie er mit andern den gantzen Tag getruncken deß
verstorbnen seel zuerquicken. Der ander fragt jn/ ob er den Armen nichts
verschafft? Terpistus aber sagt/ es gehe jhn wenig an/ was er im Testament
sag/ warumb ers nit geben weil er gelebt? Welle es lieber verprassen.
Dardurch dann Penthinius lehrnet/ was er lebendig/ Gott vnnd den Armen
geben soll.
ACTVS III. SCENA VII.
Zwen Legaten auß der Statt Moria tragen ein grosse
Summa gelt mit sich [Thesaur. Cen. par. 2. Verb. Mors. §. 112].
Dann einer haett ein Testament gemacht vnnd befohlen / man soll dasselbig
Gelt dem aller Naerrischen geben/ darmit seine Erb jm gleich waer. Seyndt
weyt herumb gezogen vnd kein rechten gefunden. Letzlich kommen sie zu
der Statt Cosmus genandt/ vonn danen einer zum Galgen gefuehrt. Begehren
zuwissen was der Arm gethan hab. Wirdt jhnen geantwortet/ es sey der
Brauch diser Statt/ welcher ein Jahr an disem Ort regier/ werde das
ander Jahr gehenckt. Fragen mit verwunderung/ ob einer moecht erfunden
werden/ welcher so Naerrisch der solches Ampt mit solcher Condition
beger? Philocosmus tritt herfuer / vnd bekennet/ er hab mit grossem
Bitt darumb angehalten/ vnnd albereit erlangt. Die Legaten seynd fro/
daß sie den rechten gefunden haben/ lassen den Cosmoërastum
hinfuehren/ diesem aber woellen sie das Gelt vor einem Rath vberlifern.
Dann sie werden je kein Naerrerischen finden koenden/ welchen noch die
Kuertze der Regierung/ noch deß vorigen Außgang abhalten
mag. Hilarion erklaert weitleufftiger dise Parabol/ vnd deutets auff
alle WeltKinder/ welche Ehr/ Wollust/ Reichthumb nachjagen/ wiewol sie
taeglich exempla sehen deren/ welche sterben/ vnd vor maenigklich zu
Spot vnd Schanden werden.
ACTVS III. SCENA VIII.
DEr Tod/ als wie ein Koenig/ wil sein macht offentlich
vnnd Triumphierlich sehen lassen. Verschafft derhalben daß Tempus,
Morbus vnd Casus jhm auß allen staenden der Welt herfuer bringen/
welche an den Reyen eintweders vor lengst oder ietz kurtzlich von jhnen
beruft seynd. Die Todten seyn gehorsam/ vnnd heben den Dantz an. Nach
dem er schier vollendt/ befilcht der Todt/ daß sie alle Symboln
vnnd Zeichen der Wuerde vnd Hochheit fuer seine Fueß nider werffen:
welche er mit seiner Seges durcheinander vermischt/ Pickel vnnd Hawen
mit dem Scepter/ Bischoffstaeb/ ec gleich macht. Als die Toden schuldige
Reuerentz gethon/ vnd verricht/ was befohlen/ ziehen sie trawrig widerumb
ab.
Der Todt ladet alle zu seinem Dantz/ vnnd beschleusst
mit disen Wortten Christi: Sehet/ Wachet vnd
bettet/ dann jhr wisset weder Zeit
noch Stundt [Marc. 13.].